Faszination
Handball
Philosophie
Unsere Teams
Sich fit halten ist manchmal keine so einfache Angelegenheit, erfuhr der
Handballabteilungsleiter im Herbst 2000, der seine Erlebnisse dann in einem
satirischen Lesererbrief an die örtliche Zeitung niederlegte, was die wiederum souverän
- wen wundert's?! - ignorierte. Da aber erhebliche Zeit in dieses Schreiben
investiert wurde, soll es hier der staunenden Menschheit dennoch zur Kenntnis gegeben
werden. Großer Dank gebührt dabei der einheimischen Volksschauspielerin Daniela Kasel,
die keine Mühe scheute, das Machwerk mundartlich zu veredeln.
Ja wo woarns denn, die Leit vom Kurier? Im Regn hams uns steh lossn beim Kurier-Be-De-Es-Rodwandrdoch, die Wormduscher, obwohl goar ka Regn do woar und bei Forkendorf die Sunna um die Wolkn gespitzt hod . Abgsocht ham sa des Rodwandrn wegn schlechda Widderung, obwohl goar ka Widderung do woar und so schlechd saa konn, das mir und hunnerd annera Rodfahra ned fohrn!
Mei Peter und iech ham uns aus die Federn gwähld am Sunndoch und selbst mei Spezi, der Hacker Jürgen, der wu in der Unni grod bromowierd und bald heiert und deswegn nuch sei letzta grußa Herausforderung suhng dud, war do, midm Maundnbeik und Kaddnmaderiol bis Kirchenpingarten. Und der Hackers Jürgen woar endeuschd obba fei net entmudigd und is nuch seina ferzich Kilomedr gefohrn mid seina annern Spezi vo da Unni.
Ja wo woarns denn, die hindderm-Compjuder-sich-Verstegger vom Kurier? Wenn des mei annera Spezi, der Konz, gwisst hädd und nuch im Schdadrod wär, der häd denna fei Faia gmacht! Wohrscheinlich ham sich die zwaa Lokal-Scheffs, die die ham in der Redagzion, der Schwab Hans und der Meier Gerd Dieter – der mid da gelbn Nosn und denna wildn Loggn aufm BEW-Plaggad – wohrscheinlich ham sich die zwaa widda net über die Kneipn in Rödersdorf einign kenna, in der wu sa als Schdreggenbostn einkehrn wollden. Und die Schdragge-Neumann Susanne, die su schee üba die Unni schreim dud, daß jeda grod gwißt hod, wos bei denna Sach is, die, die wu na Schdardschuss hädd gebn kenna, woar ned do, hod wohrscheinlich die Schdardbisdoln net bediena kenna. Und ihr Verdreder, der Dick Addi, der Kuldurredagdör, der immer su schee übba die Mussigg schreibn dud, das ma sa ganz nei hörn dun maant, ja der woar wull grod ohm beim Wachner Wolfgang, um den für die neggste Fesdschpillseisong aufzubaua, jetzd wu da Placido nimma singa dud in Bareid und vielleicht die Leid von Feelsaitig eispringa müssn, und die Meier Waldraud sich fei grämnd übern Wachner Wolfgang odda vielleichd sei Fraa.
Und da Dollinger Karsten, der wu beim Kurier-Verlooch als Leida imma die gudn Tadn dud midm Geld vom Verleecher, woar aa ned do mid die Tie-Schörts, auf die mier uns su gfreid ham für unsr Schdardgeld. Und weil niemand do woar vom Kurier, vo denna mei aaner Spezi Klaus maant, das die eh bluuß die Dadsachn verdreha dun, woar aa die Beierlein Elke ned do, die wu beim Be-De-Ess su wunderboar die Kneipn führn dud und a Familjenfeia kabt hod, und do ham mei Peter und iech unsr Schdardgeld net in Spezi umsetzn kenna. Und aa des Maundnbeik, des mei Peter und iech uns scho als Haupdgwinn reservierd ham, woar ned do, und jetzad muss iech wull duch auf meim elf Johr oldn Herggules-Leichdlaufrod weiderfohrn, vo demm imma sechs vonde zwelf Geng ned do senn, grod wemma sa braung dud.
Und als imma mehr Leid kumma senn und des Wedda fei ned schlechda hodd wern wolln, do ham mei Peter und iech uns die geschponserdn Dräningsjaggn zuzogn und senn abgebredderd auf die Fiddnässduhr, wall mir vermuhded ham, das nuch mehr Leid fohrn dun. Und den Scherer Manfred, der wu beim Kurier imma su schee übba die Griminaalfäll schreibn dud, das ma fei maant, ma sei dabei gwesn und hädds Blud fließn säng, wolldn mir aufspürn, wie’a mid seim Rennrod in Mistelbach in da Kneipn hoggd und denna Maisel ihr Geld vomehrn dud. Obba fei nix do midm Scherer Manfred, woar aa net do, wie all die Leit vom Kurier, die na ganzn Sunndoch aufs schlechda Wedder gwadd ham.
Und in Mistelbach na Berch nauf auf Forkendorf, do ham mir die Körber Sybille, die beim Be-De-Ess in da Gschäfdsstell des Sogn hod und na Vorschdond imma na Marsch blosn dud, das des fei nimmer su weida gehd mit dem Gwerch, mit ihrm Mo erwischt, wie sa as Fohrrad geschobn ham - und des bei aaner Fiddnessduhr - iech werr nimmer!
Obba mei Peter der hod in die Pedoln gedredn, das mir bei Destuben am Berch des Blud bluuß su durchn Kupf gschossn is und ausgschaut hod wie a Tomadn oder wie de Ponsels Werner im Schdadrod, wenn ihm der annere Fragdionsvorsitzende übern Margd wos gesocht hod, was goar net stimma konn, wall da Oberberchermaaster gsocht hod, daß des ned stimmen dud und der Kurier widda net drüba gschriebn hod, so wie‘s Sach is.
No ja, und wall noch zwaarazwanzich, vo meim Peter penibl middm Fohrradkumpjuter gmess‘na haddn Kilomedrn immer nuch kaana vom Kurier do woar und die Beierleins Elke sich immer nuch mid ihra Familienfeia in der Be-De-Es-Kneipn verschanzd hod, senn mei Peterr und iech widda haam gfohrn. - Schee woars beim Kurier-Rodwandrdoch ohne Widderung und ohne denn Kurier!
Jürgen Abel
Walchenseestrass aans, Bareid
Hier geht es zurück